سياسة الخصوصية
بنشرح هنا إيه البيانات اللي بنجمعها، ليه، وإزاي بنحميها — وحقوقك في التحكم فيها.
آخر تحديث: 31 أكتوبر 2026·بتسري على منصتنا وكل الأكاديميات المستضافة عليها
1. مقدمة
منصتنا منصة لإدارة التعلم بتقدم خدماتها للمؤسسات التعليمية والمعلمين وطلابهم. السياسة دي بتوضح تعاملنا مع البيانات الشخصية سواء كنت صاحب أكاديمية، معلم، طالب، أو ولي أمر.
- باستخدامك للمنصة إنت موافق على السياسة دي.
- لو في تعارض بين النسخة العربية وأي ترجمة، النسخة العربية هي المعتمدة.
- بيانات كل أكاديمية معزولة عن غيرها ومش بنشاركها مع أكاديميات أخرى.
2. البيانات اللي بنجمعها
بنجمع الحد الأدنى اللازم لتشغيل الخدمة:
- بيانات الحساب: الاسم، رقم الموبايل، الإيميل، والصورة (اختيارية).
- بيانات أكاديمية: الكورسات، الدرجات، الواجبات، الحضور، وتقدم الطالب.
- بيانات ولي الأمر: رقم التواصل لإرسال التقارير والتنبيهات.
- محادثات المساعد الذكي: أسئلة الطالب للمساعد الذكي بتاع الأكاديمية والردود عليها.
- ذاكرة المساعد (TodiAI): ملاحظات قصيرة بيكتبها المساعد من المحادثات عن طريقة تعلّم الطالب وأهدافه والحاجات اللي بيتلخبط فيها (ولعضو فريق الأكاديمية: طريقة شغله)، لحد 200 ملاحظة للطالب و500 للعضو، من غير أرقام أو إيميلات أو عناوين أو أي حاجة عن الصحة أو العيلة. صاحبها بيشوفها ويقدر يمسح أي جزء منها أو يمسحها كلها، والأكاديمية تقدر توقفها.
- بيانات الدفع: بتتم معالجتها عند بوابات الدفع؛ إحنا مابنخزنش بيانات الكروت.
- بيانات تقنية: نوع الجهاز، المتصفح، عنوان IP، وسجل الدخول لأغراض الأمان.
- مشاهدة الفيديوهات: كام دقيقة الطالب اتفرج عليها من كل درس كل يوم، ومن أنهي جهاز وعنوان IP اشتغل كل فيديو، عشان المدرس يتابع طلابه ويكتشف الحساب اللي بيتشارك بين أكتر من شخص. سجل الأجهزة بيتمسح بعد 6 شهور، وسجل المشاهدة بعد سنة.
3. إزاي بنستخدم البيانات
الاستخدام محصور في الأغراض الآتية:
- تشغيل الخدمة: إدارة الكورسات والامتحانات والحضور والمدفوعات.
- المتابعة التلقائية: إرسال تنبيهات وتقارير للطالب وولي الأمر على واتساب أو SMS أو الإيميل.
- متابعة المدرس: مدرس الأكاديمية وفريقه اللي عندهم صلاحية شوف الطلاب يقدروا يقروا محادثات كل طالب مع المساعد الذكي كاملة وذاكرة المساعد عنه، عشان يتابعوه ويساعدوه. ده مكتوب للطالب في الشات نفسه.
- تحسين التجربة: تحليل الأداء لتقديم توصيات تعلم مخصصة.
- الأمان: كشف محاولات الدخول المشبوهة وحماية المحتوى من القرصنة.
- التواصل الإداري: إشعارات الفاتورة والتجديد والتغييرات في الخدمة.
5. حماية البيانات
بنستخدم إجراءات تقنية وتنظيمية لحماية بياناتك:
- تشفير كامل للاتصال (SSL) وتشفير البيانات الحساسة (AES).
- نسخ احتياطي تلقائي يومي.
- صلاحيات دقيقة لكل مستخدم وسجل كامل للعمليات.
- تتبع الأجهزة وحظر المحاولات المشبوهة تلقائياً.
- مراجعة دورية لصلاحيات الفريق الداخلي.
- فريق دعم منصتنا ممكن يفتح حساب مدرس أو طالب بوضع «العرض كـ» عشان يساعد أو يحل مشكلة: الزيارة مؤقتة، كل اللي بيتعمل فيها بيتسجّل باسم الموظف، ومينفعش فيها تغيير كلمة السر أو رقم الموبايل أو طرق الدخول.
6. حقوقك
في أي وقت تقدر تطلب:
- الوصول لنسخة من بياناتك.
- تصحيح أي بيانات غير صحيحة.
- حذف حسابك وبياناتك (مع استثناء ما يلزم الاحتفاظ به قانونياً أو محاسبياً).
- إلغاء الاشتراك في الرسائل التسويقية — رسائل الخدمة الأساسية بتستمر.
- الاعتراض على المعالجة الآلية لبيانات الأداء.
7. مدة الاحتفاظ
بنحتفظ بالبيانات للمدة اللازمة لتقديم الخدمة:
- بيانات الأكاديمية النشطة: طوال مدة الاشتراك.
- بعد انتهاء الاشتراك أو إلغائه: البيانات بتفضل محفوظة عشان ترجع تكمّل من مكانك، وموقع الأكاديمية بيتقفل عند الطلاب. تقدر تطلب حذف الأكاديمية وبياناتها نهائياً في أي وقت من صفحة التواصل.
- الفواتير والسجلات المالية: بتتحفظ للمدة اللي يلزمها القانون.
- رسائل واتساب ومحادثات أولياء الأمور مع الأكاديمية: سنة (365 يوم)، وبعدها بتتمسح تلقائياً.
- محادثات الطلاب وفريق الأكاديمية مع المساعد الذكي: سنة من آخر رسالة، وبعدها المحادثة كلها بتتمسح تلقائياً.
- أحداث الاستخدام داخل المنصة: 180 يوم، وسجل العمليات الأمني: سنة، وبعدها بيتمسحوا تلقائياً.
8. بيانات الأطفال
المنصة بتستخدمها مؤسسات تعليمية فيها طلاب أقل من 18 سنة.
- مسؤولية الحصول على موافقة ولي الأمر على المؤسسة التعليمية المستخدمة للمنصة.
- بيانات الطالب مش بتُستخدم في أي إعلانات.
- ولي الأمر يقدر يطلب من المؤسسة نسخة من بيانات ابنه أو حذفها.
9. تحديث السياسة
ممكن نحدّث السياسة دي كل فترة.
- أي تغيير جوهري بنبلّغك بيه بالإيميل أو داخل المنصة قبل تطبيقه.
- تاريخ آخر تحديث مكتوب أعلى الصفحة.
- للتواصل بخصوص الخصوصية: ابعتلنا من نموذج الرسائل أو الواتساب في صفحة التواصل.
أسئلة عن خصوصيتك؟
لأي طلب يخص بياناتك (وصول، تصحيح، حذف) كلمنا وهنرد خلال 14 يوم عمل.